دورِ حاضر کے ایک نقاد کے بقول حضرت علامہ اقبالؒ بلاشبہ ایک عظیم شاعر تھے مگران کی ایک بات پر مجھے شدید اعتراض ہے۔ انھوں نے اپنی شاعری میں شاہین نامی ایک فرضی پرندے کا تو بہت زیادہ ذکر کیا ہے جبکہ مرغ نامی ایک عوامی پرندے کو وہ نظرانداز کر گئے۔ شاہین فرضی پرندہ اس لیے کہ یہ پرندہ کبھی ہمارے ملک میں نظر نہیں آیا۔ اس کا ذکر ماضی بعید کی کہانیوں میں یا پھر علامہ اقبالؒ کی شاعری میں ہی ملتا ہے۔ اس کے برعکس مرغ ایک ایسا پرندہ ہے جو ہمارے اردگرد بکثرت پایا جاتا ہے۔

مرغ نیل کے ساحل سے لے کر تابخاکِ کاشغر مقبول ہے۔ اسکول میں اساتذہ بچوں کو مرغا بنا کر، دعوتوں میں لوگ اس کو شکم میں اتار کر،  مرید اپنے پِیر کو چڑھا کر اور بعض ظالم اسے لڑا کر اس پرندے سے اپنی محبت کا اظہار کرتے ہیں۔ اس کی اہمیت کا اندازہ اس بات سے بھی لگایا جا سکتا ہے کہ دیہات میں نامعلوم مقاصد کیلیے سب سے زیادہ چوری ہونے والی شے بھی یہی ہے۔
مرغ انسانوں سے گہری محبت رکھتے ہیں اور اسی محبت کی بنا پر انھوں نے انسانوں کی بھی کئی عادات اپنا لی ہیں۔ پہلے مرغے فجر کے قریب بانگیں دیا کرتے تھے تاکہ لوگ جلدی اٹھ جائیں مگر اب رات کے ایک یا دو بجے کے قریب سونے سے پہلے بانگ دیتے ہیں اور سو جاتے ہیں اور پھر سورج کی تیز دھوپ ہی ان کو جگاتی ہے۔

علامہ اقبال کے برعکس سید ضمیر جعفری مرغ کے پر تک کی اہمیت سے اچھی طرح واقف تھے۔ ان کے ایک شعر سے اس امر کا اظہار ہوتا ہے:

 میری درویشی کے جشنِ تاجپوشی کے لیے
ایک ٹوپی اور مرغی کے کچھ پر پیدا کرو

آپ نے حقیقت پسندی کا مظاہرہ کرتے ہوئے مزید فرمایا کہ

حضرتِ اقبال کا شاہین تو کب کا اُڑ گیا
اب کوئی اپنا مقامی جانور پیدا کرو

 

کسی جنگل میں ایک بھینسا رہتا تھا۔ جنگل کے جس حصے میں وہ قیام پذیر تھا وہاں گھاس کی کافی قلت تھی۔ وہ چرنے کیلیے جنگل کے دیگر قطعوں میں جانے سے ڈرتا تھا کیوں کہ وہاں دیگر جانوروں کا راج تھا اور وہ اسے ادھر پھٹکنے نہیں دیتے تھے اور اسے مار بھگاتے تھے۔ اس صورتحال کی وجہ سے بھینسا بہت کمزور ہو گیا۔ 

ایک رات بھینسا سویا ہوا تھا کہ اسے خواب میں ایک بزرگ بھینسے کی روح کی زیارت ہوئی۔ انہوں نے اسے حالات تبدیل کرنے کیلیے جنگل کی سیاست میں عملی حصہ لینے کا مشورہ دیا اور کامیابی کی بشارت بھی دی۔ صبح اٹھ کر بھینسے نے بزرگ بھینسے کی روح کے مشورے پر عمل کرنے کا فیصلہ کر لیا۔

ابتدا میں بھینسے نے اپنے قطعہ کے کمزور جانوروں کو اکٹھا کیا اور انہیں ان کے بنیادی حقوق سے آگاہ کیا۔ آہستہ آہستہ جانوروں کا ایک گروہ اس کا ہم خیال بن گیا اور انہوں نے جنگل کے دیگر قطعوں میں ابھی اپنے انقلابی نظریات کا پرچار کرنا شروع کر دیا۔ وقت گزرتا گیا اور بھینسے کے گرد بے شمار جانور اکٹھے ہو گئے جن میں اکثر خونخوار درندے بھی شامل تھے۔ اب بھینسے نے انہیں جنگل کا کنٹرول حاصل کرنے کا حکم دے دیا اور جنگل میں ایک نہ ختم ہونے والا خون خرابہ شروع ہو گیا۔

جنگ کے دوران جب بھینسے پر بھی حملے ہوئے تو وہ جان بچانے کیلیے ایک دور دراز جنگل میں بھاگ گیا اور وہاں پناہ حاصل کی۔ وہاں کی آب و ہوا اور خوراک بھینسے کو خوب راس آئی اور اس کی گردن اور منہ خوب موٹے ہو گئے اور پیٹ کا حجم تین گنا ہو گیا۔ 

اب بھینسا وہاں موٹاپے کی وجہ سے عجیب و غریب آواز میں ڈکراتا پھرتا ہے اور وہاں سے اپنے گروہ کو جنگی ہدایات بھیجتا رہتا ہے اور اس کے گروہ کے جانور جنگل میں اقتدار کی جنگ جاری رکھے ہوئے ہیں۔ 

بعض جانور اسے مشورہ دیتے ہیں کہ واپس اپنے جنگل میں چلے جاؤ مگر بھینسا انتہائی سیانا ہو چکا ہے۔ وہ جانتا ہے کہ انقلاب اپنے رہنما کا خون مانگتا ہے اور بھینسے کو اپنی جان بہت پیاری ہے۔ 

شاگرد ۱: عوام کو دھوکہ دیتے ہیں!

شاگرد ۲: ملکی خزانے کو لوٹتے ہیں!

شاگرد ۳: عوام کو بے وقوف بناتے ہیں!

شاگرد ۴: عوام کے ساتھ جھوٹے وعدے کرتے ہیں!

شاگرد ۵: ملک کے ساتھ غداری کرتے ہیں!

شاگرد ۶: ملک کے ٹکڑے کرتے ہیں!

شاگرد ۷: لوگوں کو قتل کرواتے ہیں!

شاگرد ۸: حرام خوری کرتے ہیں!

شاگرد ۹: بے غیرتی کرتے ہیں! 

شاگرد ۱۰: ………………………………

شاگرد ۱۱: ……………………………….

…………………………………………………

استاد: آخر آپ لوگ یہ کیوں نہیں کہتے کہ وہ “سیاست” کرتے ہیں؟

شاگرد : کیونکہ ہم طالبِ علم ہیں۔ سیاستدان نہیں!                                                                                                                                                                                  

چند سال قبل پاکستان کی وزاتِ بہبودِ آبادی نے ملک کی تیزی سے بڑھتی ہوئی آبادی کو  روکنے میں ناکامی کا اعتراف کیا۔ وفاقی وزیر نے کابینہ کو بتایا کہ محکمہ اپنے مقاصد میں بری طرح ناکام ہو چکا ہے۔ ملک کی بڑھتی ہوئی آبادی کو روکنا اب اس کے بس میں نہیں رہا۔ وزیر نے سفارش کی کہ ان  کے محکمے کا کام ملک کی سیکیورٹی فورسز کو سونپ دیا جائے کیونکہ وہ لوگ یہ کام زیادہ بہتر طریقے سے سرانجام دے سکتے ہیں۔ انہوں نے مزید کہا کہ خاندانی منصوبہ بندی  کی گولیوں کے پیسے ہمیں دے کر ضائع کرنے کی  بجائے فورسز کو دیئے جائیں تاکہ وہ  زیادہ زود اثر گولیاں خرید سکیں۔ وفاقی کابینہ نے اس تجویز کا خیر مقدم کیا اور اسے فوراً منظور کر لیا گیا۔

انسانی حقوق کی کچھ تنظیموں نے  پاکستانیوں سے درخواست کی ہے کہ اگر آپ لوگ چاہتے ہیں کہ آپ کے پیاروں کو آپ کیلیے رونا نہ پڑے تو وردی والوں اور ان کی گاڑیوں سے کم از کم ایک ہزار میٹر کا فاصلہ رکھیں تاکہ آپ کی جان خطرے میں نہ پڑے۔

“حکیم صاحب   میرا مسئلہ کچھ نفسیاتی نوعیت  کا ہے۔ میں موجودہ ملکی حالات سے دلبرداشتہ ہو چکا ہوں۔ مذہب کے نام نہاد ٹھیکیدار فساد فی الارض میں مصروف ہیں نیز خواب میں بھی مولوی مجھے آ کر ڈراتے ہیں۔ میں اس نتیجہ پر پہنچا ہوں کہ تمام مسائل کی جڑ مذہب ہی ہے۔ اب میں مذہب سے بیزار ہو چکا ہوں!”

حکیم صاحب نے تحمل سے میری بات سنی اور فرمایا کہ” برادرم! میں آپ کا درد سمجھ چکا ہوں۔ آپ کے جسم میں روشن خیالی کے جراثیم پرورش پا رہے ہیں مگر آپ فکر مت کریں”۔ اس کے بعد حکیم صاحب نے روشن خیالی کے جراثیم مارنے کیلیے ایک مجرب حکیمی نسخہ تجویز کیا جو فلاحِ عامہ کی خاطر میں آپ سے یہاں شیئر کر رہا ہوں:

اجزائے ترکیبی:

اطریفل، اسگند ناگوری، بکھڑا، ثعلب دانہ، لال بیگ، چھپکلی ، گدھی کا دودھ اور چوہے کی مینگنیاں

ترکیب:
۱۔ دو عدد موٹی چھپکلیاں مار کردھوپ میں  سکھا لیں۔ اگر وقت بچانا چاہتے ہیں تو چھپکلیوں کو توے پر بھون لیں۔
۲۔ تین عدد لال بیگ پکڑ کر انہیں ہلکی آنچ پر پندرہ منٹ ابالیں تاکہ وہ جراثیم سے پاک ہو جائیں۔ اس کے بعد ان کے پر کاٹ کر پھینک دیں۔
۳۔ اسگند ناگوری، ثعلب دانہ ، بکھڑا اور اطریفل ہم وزن لے کر ہاون دستہ میں اچھی طرح کھرل کر لیں  اور ان کا سفوف بنالیں۔
۴۔  خشک چھپکلیاں، ابلے ہوئے لال بیگ اور سفوف ایک ہانڈی میں ڈالیں اور ایک پاؤ  گدھی کا دودھ  ملا کر چولہے پر رکھ دیں اور چمچ ہلانا شروع کر دیں۔
۵۔  چمچہ ہلاتے ہوئے ایک ایک کر کے چوہے کی مینگنیاں ہانڈی میں پھینکتے جائیں حتیٰ کہ ایک مغلظ محلول تیار ہو جائے۔
اب اس محلول کو ٹھنڈا کر کے ایک صاف شیشے کی بوتل میں محفوظ کر لیں۔ دوا تیار ہے۔

طریقہ استعمال:

دوا  لینے کیلیے آپ کو تین عدد  مضبوط مولویوں کی ضرورت پڑے گی۔ ایک چارپائی پر سیدھے لیٹ جائیں۔ ایک مولوی آپ کو بازوؤں سے اور ایک آپ کو ٹانگوں سے کس کر پکڑ رکھے۔ تیسرا مولوی دوا کا ایک چمچ زبردستی آپ کے منہ میں ڈالے۔  امید ہے پہلی خوراک سے ہی کافی افاقہ ہو گا ورنہ ہر روز یہ عمل دہرایا جائے جب تک بیماری ختم نہیں ہو جاتی۔

یہ نسخہ بتانے کے بعد حکیم صاحب کو چھیاسی کالیں موصول ہوئیں جن میں سب لوگوں نے قے روکنے کا نسخہ دریافت کیا تھا۔ حکیم صاحب نے ہنستے ہوئے ان سب کو قے اور متلی روکنے کیلیے یہی دوا تجویز کی۔

  جب نئے بادشاہ کو منتخب کرنے کا وقت آیا تو ہر طرف بحث شروع ہو گئی۔ مختلف لوگوں نے اپنی اپنی آراء پیش کیں۔ آخر فیصلہ یہ ہوا کہ ملک کے سب سے بے ضرر انسان کو بادشاہ بنایا جائے تاکہ عوام پر کوئی ظلم نہ ہو اور وہ ہنسی خوشی زندگی بسر کر سکیں۔ اس کے بعد عوام نے متفقہ طور پر ایک مداری کو اپنا بادشاہ منتخب کر لیا۔

جب ہمسایہ ممالک کو علم ہوا کہ وہاں اب ایک مداری حکومت کر رہا ہے تو وہ بہت خوش ہوئے اور انہوں نے سازباز کر کے حملہ کر دیا۔ محل میں کسی نے آکر مداری کو اطلاع دی کہ دشمن نے حملہ کر دیا ہے۔ مداری کے کان پر جوں تک نہ رینگی اور وہ اپنے تماشے میں مگن رہا۔ آہستہ آہستہ حملے کی خبر پھیل گئی تو لوگ محل کے باہر اکٹھے ہو گئے۔ دربان نے مداری کو بتایا کہ “بادشاہ سلامت، محل کے باہر سب لوگ جمع ہو گئے ہیں اور کاروائی کا مطالبہ کر رہے ہیں”۔ یہ سن کر مداری نے ڈگڈگی پکڑی اور اپنے بندر کو لے کر محل سے باہر آیا۔ اس نے لوگوں کو بتایا کہ بے فکر رہو میں کاروائی کرنے لگا ہوں۔

 اور اس کے بعد سب لوگ بندر کا تماشہ دیکھنے میں محو ہو گئے اور انہیں یاد ہی نہ رہا کہ دشمن کی فوجیں ان کے سر پر پہنچ چکی ہیں۔ جب ایک ہرکارے نے آخری بار سب کو خطرے سے آگاہ کیا تو مداری اپنے گدھے پر اپنے سازوسامان سمیت سوار ہو گیا اور یہ کہتے ہوئے وہاں سے چل دیا کہ “جو میں تمہارے لیے کر سکتا تھا کر دیا، اب تم جانو اور تمہارا ملک!”  

یہ بچہ جب تھوڑا بڑا ہوا تو اس کے ماں باپ اس کی شرارتوں سے عاجز آ گئے۔ وہ  زیادہ تر کپڑوں سے بے نیاز گلیوں میں گھومتا پھرتا اور راہ چلتے لوگوں کو نت نئے القابات سے نوازتا۔ جب وہ سکول داخل ہوا تو اس کے بدن پر کپڑے تو آ گئے مگر اس کی شیطانیوں میں اضافہ ہو گیا۔  اس کی سب سے بڑی فنکاری جس سے سب چھوٹے بڑے نالاں تھے، جھوٹ میں مہارت تھی۔ وہ بڑی چالاکی سے طویلے کی بلا بندر کے سر ڈال دیتا۔ اسی مہارت کے باعث اس نے زندگی میں بہت ترقی کی۔

دورانِ تعلیم لوگوں کے روایتی نسلی تعصب اور پھبتیوں سے بچنے کیلیے اس نے اپنے نام کے ساتھ راجہ کی بجائے ملک کا اضافہ کیا تاکہ کسی کو کوئی شک نہ ہو۔ تعلیم مکمل کرنے کے بعد وہ پولیس میں بھرتی ہوا کیونکہ اسے معلوم تھا کہ سب سے زیادہ مال اسی محکمہ میں ہے اگر کوئی کھانے والا ہو تو۔ دورانِ نوکری اس کے جوہر کھلے اور وہ ترقی کرتا محکمے کا سربراہ بن بیٹھا مگر جب اس کی حرکتیں برداشت سے باہر ہو گئیں تو حکومت نے اس کی چھٹی کر دی۔

 اس وقت تک وہ اپنے علاقے میں کافی مشہور ہو چکا تھا لہٰذا اس نے عوام کی خدمت کرنے کیلیے سیاست میں آنے کا فیصلہ کیا اور ایک مشہور سیاسی پارٹی کے ٹکٹ پر قومی اسمبلی میں پہنچ گیا اور اس کے ایک کارنامے سے پارٹی نے خوش ہو کر اسے وزیر بنا دیا۔

آج  کل وہ اپنے انوکھے  بیانات کی وجہ سے ملک اور بیرونِ ملک بے حد مقبول ہے۔ اہم ملکی معاملات پر وہ معنی خیز خاموشی  اختیار کر لیتا ہے اور پھر جب وہ بولتا ہے تو  ایسا محسوس  ہوتا ہے جیسے بند گٹر کھلنے پر اردگرد  کی فضا بدبودار ہو گئی ہو اور لوگوں کی سانس بند ہو جائے۔

نقشِ خیال ۔ عرفان صدیقی

پاکستانیوں کی بہت بڑی تعداد ایک سوگ کی سی کیفیت میں رہی۔ اس لئے نہیں کہ یہ سادہ و معصوم لوگ دہشت گردی سے ناتا رکھتے اور دہشت گردوں سے محبت کرتے ہیں۔ اس لئے بھی نہیں کہ اسامہ بن لادن ان کا محبوب تھا۔ اس لئے کہ ازل ازل سے انسانوں کی فطرت، خدا فراموش فرعونوں سے نفرت کرتی اور ان فرعونوں کو للکارنے والوں کو اپنا اپنا سا سمجھتی ہے۔ فرعونوں کا معتوب، جو کوئی بھی ہو، جیسا بھی ہو، انسانوں کا محبوب بن جاتا ہے۔ کیا اسامہ کی حکمت عملی اسلامی تعلیمات کے مطابق تھی؟ کیا ایک مرد دانا کی طرح وہ زمینی حقیقتوں کا شعور رکھتا تھا؟ کیا اس کے چنے ہوئے راستے نے بالعموم امت مسلمہ کے مفادات کی آبیاری کی؟ ان سوالوں پہ پہلے بھی بحث ہوتی رہی ، آئندہ بھی ہوتی رہے گی، دنیا میں ایسا کوئی شخص پیدا نہیں ہوا جس کے فکر و عمل سے اختلاف کرنے والا کوئی نہ ہو۔ اسامہ پر پہلے بھی سنگ زنی ہوتی رہی، آئندہ بھی نشتر زنی ہوتی رہے گی لیکن اس کی روح اب سود و زیاں کے دنیوی پیمانوں سے بہت دور جا چکی ہے۔ امریکہ ، نیٹو، یورپی یونین، اقوام متحدہ اور شکم پرست ہراول دستوں کی دسترس سے کوسوں آگے۔
ٹیلی فونوں اور پیغامات کا تانتا بندھا رہا کہ اسے شہید، کیوں نہیں کہا جا رہا؟
میں دل گرفتہ اہل وطن کو سمجھاتا رہا کہ معصوم و سادہ دل لوگو! ہم اسے شہید نہیں کہہ سکتے۔ اس لئے کہ شہنشاہ عالم پناہ خفا ہو جائے گا۔ اس لئے بھی کہ ہم دس سال سے، امریکی جنگ کا دست بازو ہیں اور اسامہ ہمارے مخالف لشکر میں سے تھا۔ اس لئے بھی کہ ہم اپنا پیٹ پالنے کے لئے امریکی نان نفقے کے محتاج ہیں۔ اس لئے بھی کہ امریکا دنیا کا تاجدار اور جابر ملک ہے اور ہمارے حکمرانوں کی باگیں اس کے ہاتھ میں ہیں۔ اور سب سے بڑھ کر اس لئے کہ ’دین غلامی“ میں امریکہ کو آنکھیں دکھانے اور اس سے پنجہ آزمائی کرنے والا غازی کہلا سکتا ہے نہ شہید۔
دو دن سے ٹی ۔ وی چینلوں پر ایک تماشا سا لگا ہے۔ خبریں، تصویریں، فلمیں، تبصرے، تجزیے، امکانات، خدشات۔ میں ریموٹ کے بٹن دبا دبا کر چینل بدلتا اور میڈیا کے چلن دیکھتا رہا۔ ہر پاکستانی چینل پر وہی بولی، بولی جا رہی تھی جو اسامہ کے بارے میں امریکہ، یورپ اور دنیا کے دیگر مسلم بیزار منطقوں میں بولی جاتی ہے۔ ہم اسے مسلسل امریکہ کی آنکھ سے دیکھتے رہے، اس کے بارے میں پھیلائی گئی امریکی کہانیاں دہراتے رہے اور وقفے وقفے سے امریکہ ہی کی زبان میں اس پر تبصرے کرتے رہے۔ غلامی اسی طرح دلوں اور ذہنوں کے اندر گھونسلے بناتی ہے ۔ ہمیں کچھ ضرورت نہیں کہ اس کی زندگی کے نشیب و فراز کا جائزہ لیں اربوں اور کھربوں میں کھیلنے اور سونے کا چمچہ منہ میں لے کر پیدا ہونے والا شہزادہ، انجینئرنگ میں اعلیٰ تعلیم حاصل کرنے والا ہونہار نوجوان، اپنے خاندان کی بے کراں دولت لامحدود کاروباری امکانات اور عیش و عشرت سے پُر زندگی سے دستکش ہو کر غریب الوطنی، سخت کوشی، جہدو پیکار اور سامراج دشمنی کے خار زاروں کی طرف کیوں نکل آیا؟ دنیا میں کتنے ہیں جو شہزادگی ٹھکرا کر کسی مقصد کی لگن میں ایسی راہوں پر نکل آتے ہیں جہاں اذیتوں اور مشقتوں کے سوا کچھ نہیں ہوتا اور جہاں موت سائے کی طرح ساتھ ساتھ چل رہی ہوتی ہے ۔ دو دو ٹکے کی نوکریوں اور رسوائیوں میں گندھی بے ننگ و نام حکومتوں کے لئے اپنی آن اور اپنا ایمان بیچ دینے والوں کی اس دنیا میں کتنے ہیں جو جُنوں کا ایسا سرمایہ رکھتے ہوں؟
جب وہ افغانستان کے پہاڑوں، گھاٹیوں اور میدانوں میں سوویت یونین سے لڑ رہا تھا، جہاد منظم کر رہا تھا، اس کی دولت تحریک مزاحمت کی رگوں میں لہو بن کر دوڑ رہی تھی تو وہ ”عظیم مجاہد“ اور ” بہادر جانباز“ کہلاتا تھا۔ امریکہ اس کی بلائیں لیتا تھا۔ اس کی راہوں میں سرخ قالین بچھاتا تھا، پھر زمانہ بدلا۔ روس دریائے آمو کے اس پار چلا گیا کم و بیش چوتھائی صدی بعد امریکہ اسی اسامہ کی تلاش میں افغانستان پر چڑھ دوڑا۔ اس لئے کہ اسامہ امریکی توسیع پسندی کے خلاف تھا۔ اس کا نعرہ تھا کہ امریکی افواج سعودی عرب اور دیگر اسلامی ممالک سے نکل جائیں وہ امریکا کی اسرائیل نوازی پر بھی معترض تھا۔ نائن الیون کے فوراً بعد اعلان ہوا کہ یہ اسامہ کا کیا دھرا ہے ۔ آج تک اس الزام کا کوئی ایک ٹھوس ثبوت سامنے نہیں لایا جا سکا۔ اکتوبر 2001ء میں امریکہ نے افغانستان پر یلغار کر دی۔ دنیا کا سب سے بڑا بارود خانہ اور مہلک ٹیکنالوجی رکھنے والا ملک، بیسیوں عالمی افواج کے ساتھ ایک عشرے تک ٹامک ٹوئیاں مارتا رہا۔ اسامہ نے کہا تھا۔ ”تم مجھے زندہ گرفتار نہیں کر سکتے“ اس نے اپنے جانثار گارڈ سے کہہ رکھا تھا کہ ”جب کبھی مجھے گرفتار کرنے کی کوشش کی جائے تو میرا سینہ چھلنی کر دینا“ ایک معتبر اخباری رپورٹ کے مطابق ایسے ہی ہوا۔ کامل دس برس تک ایک شخص عالمی فرعون کے لہو میں انگاروں کی طرح دہکتا رہا۔ اس کے دل میں ترنیم کش کی طرح پیوست رہا۔ رعونت میں لتھڑے حکمران پہاڑوں سے سر پھوڑتے، وادیوں میں بھٹکتے رہے لیکن ایک ”سرکش باغی“ کو زنجیر نہ ڈال سکے۔
شہنشاہ عالم پناہ بارک اوباما نے کہا ” انصاف ہو گیا۔ یہ پوری دنیا کے لئے خوشی کا دن ہے“ اس نے دہشت گردی کے نتیجے میں ہلاک ہونے والوں کا ذکر کیا۔ یتیم ہو جانے والے بچوں، اجڑی آغوش والی ماؤں اور اولاد کھو دینے والے باپوں کا تذکرہ کیا۔ اسرائیلی وزیراعظم نے خوشی کے شادیانے بجائے۔ سارا یورپ جشن کی سی کیفیت میں آگیا۔ بھارت کا چہرہ تمتما اٹھا کابل کے چغہ پوش مسخرے کی باچھیں کھل اٹھیں۔ اور سید عبدالقادر گیلانی کے خانوادے سے تعلق کا دعویٰ کرنے والے سید زادہ ملتان اعلیٰ حضرت یوسف رضا گیلانی نے کہا۔ ”یہ فتح عظیم ہے۔“ اقتدار کی چند روزہ لذتیں بھی انسان کو کتنا کھوکھلا ، کتنا بودا، کتنا خالی خالی سا کر دیتی ہیں۔
ہمارے وزیراعظم نے ہزاروں قتل اسامہ کے کھاتے میں ڈال دیئے۔ انہیں امریکی ڈرونز کا لقمہ بننے والوں کی یاد نہ آئی جو نائن الیون کے ہلاک شدگان سے بہر حال زیادہ ہیں۔ پہلے دفتر خارجہ اور پھر وزیراعظم نے قومی تاریخ کا سب سے لغو، سب سے بے معنی، سب سے بے حمیت اور سب سے لایعنی بیان داغا کہ ”امریکہ نے سب کچھ اپنی اعلان کردہ پالیسی کے مطابق کیا ہے“ کیا معنی ہیں اس بے سروپا جملے کے، سب جانتے ہیں کہ امریکہ نے جو کچھ کیا، وہ اس کی پالیسی اس کی تاریخ، اس کے مزاج اور اس کی رعونت کے عین مطابق ہے لیکن پاکستان کی پالیسی کیا ہے؟ اگرکل امریکہ اپنے اہداف اور اپنی پالیسی کے مطابق ہمارے ایٹمی اثاثوں کے خلاف ایسا ہی آپریشن کر ڈالے تو سید زادہ کیا یہی تسلی دے گا کہ ”یہ امریکی حکومت نے اپنی طے شدہ پالیسی کے مطابق کیا ہے؟“ یہ بے حمیتی کا وہ مقام ہے جس پر بات کرتے ہوئے قلم کو بھی ندامت محسوس ہوتی ہے۔
سوالات ہیں اور ان گنت ہیں۔ کئی گھنٹے گزر جانے کے بعد بھی قوم اندھیرے میں ہے۔ سوالات کے اس لق و دق جنگل سے کوئی راستہ نہ نکلا تو پاکستان شدید مشکلات کا شکار ہو جائے گا۔ ابھی سے آثار نظر آرہے ہیں کہ اس ڈرامے کے ذریعے حکومت، فوج اور آئی۔ ایس۔ آئی کو مجرم بنا کر عالمی کٹہرے میں کھڑا کر دیا گیا ہے دیکھئے آگے دیکھئے کیا ہوتا ہے؟ اور اوباما کو کون بتائے کہ ہمارے بچے بھی درختوں پر نہیں لگتے، ماؤں کی کوکھ سے جنم لیتے ہیں اور دنیا اسامہ کے نہ رہنے سے امن نہیں پائے گی، اس دن سکون آشنا ہو گی جب فرعون مزاج امریکہ دوسروں کو بھی انسان سمجھنے لگے گا۔
اب شیخ اسامہ بن لادن کا معاملہ اپنے اللہ کے ساتھ ہے۔ جو ہر انسان کے ظاہری عمل کو بھی دیکھتا ہے اور نیتوں کا حال بھی جانتا ہے۔ اسے ہم جیسے خود فروشوں، بزدلوں، کمزوروں، شکم پرست بونوں اور بندگان امریکہ کی طرف سے ”شہادت“ کے کسی تمغے کی حاجت نہیں۔ اگر وہ اللہ کی میزان میں کم وزن نکلا تو سزا پائے گا۔ اگر اس کے اعمال بارگاہ عالی میں مقبول ٹھہرے تو اس کی لاش سمندر کی مچھلیاں کھائیں یا جنگل کے درندے، وہ شہیدوں کے جلو میں کسی سنہری مسند پر بیٹھا ہو گا۔
اگر شہنشاہ عالم برا نہ مانیں اور اس کی چوکھٹ پہ سجدہ ریز ہمارے حکمران خفا نہ ہوں تو آیئے اس کے لئے دست دعا بلند کریں۔ اللہ اس کی لغزشوں اور کوتاہیوں سے درگزر فرمائے، اسے اپنے بے پایاں عفو و کرمسے نوازے اور اسے اپنے بندگان خاص کے مقام سے سرفراز فرمائے۔ آمین

لومڑی اور گیدڑ کی یہ عاجزی دیکھ کر شیر نے شکار کے تین حصے کیے۔ ایک حصہ اپنے سامنے رکھ لیا کہ “میں بھی شکار میں شامل تھا”۔

دوسرا حصہ بھی اپنے سامنے گھسیٹ لیا اور دونوں کو بتایا کہ “میں چونکہ بادشاہ ہوں لہٰذا اس حصے پر میرا حق ہے”۔

اور تیسرے حصے پر اپنا پنجہ رکھ دیا اور کہا کہ “اگر ہمت ہے تو اٹھا لو”۔

اتنی ذلالت اور بے عزتی کے باوجود بھی لومڑی اور گیدڑ جب اپنے اپنے قبیلوں میں واپس گئے تو خوشی کے مارے پھولے نہیں سماتے تھے کہ انہیں بھی بادشاہ کے ہمراہ شکار کھیلنے کا اعزاز حاصل ہوا ہے۔